Arrazoiren batengatik, ordenagailuen munduan  bizitza guztian ‘programak’ izan direnak, hau da, makinarekin gauzak egiteko software piezak, sakelako gailuen munduan ‘aplikazioak’ dira. Ingelesezko application hitzetik. Eta dena azkar eta labur esan eta idatzi behar denez,  hitz horren laburdura behar dugu eguneroko erabilerarako. Eta ingelesez application hitzari hegoak ebaki eta app erabiltzen dutenez barra-barra, eta españolek ere app bereganatu dutenez egunero erabilerarako, pues hale, guk ere bai. App gora eta app behera egun santu guztian.

Eta uste dut txarto egin dugula. Besteak beste, app laburdura horrek arazo praktikoak sortzen dizkigulako eguneroko erabileran. Besteak beste:

  • Nola arraio esan behar da? Ez esan ez duzula sekula zalantza hori izan. Ez dizut sinisten!!!
    • Apepe? Apepe bat instalatu dut? Aber: ‘app’ ez da akronimo bat, laburdura baizik! ‘Apepe’ esatea da ‘Mese’ esateko ‘EME E ESE E’, edo ‘Mani’ esateko ‘EME A ENE I’ esatea beste! Eta ez naiz horrela pentsatzen duen bakarra, e?!?
    • Ap? Txantxetan zabiltza ezta? Googleren apak arriskutsuak dira? Mesedez eta faborez!
  • Nola arraio deklinatu behar da?
    • Zure appa gustatzen zait?
    • Ez daukat horretarako appik?
    • Dirutza gastatu dut appetan?

Hori guztia kontuan hartuta, eta euskaldunok hitza benetan ‘geure’ egite aldera, hona nire proposamena:

Euskaraz ari garenean, “apli” erabiltzea “aplikazio” hitzaren laburdura gisa.

Frantsesez ere oso zabalduta dago 'appli' laburdura
Frantsesez ere oso zabalduta dago ‘appli’ laburdura

Askoz naturalagoa da, eta arazo gutxiago ematen digu eguneroko diskurtsoan sartzeko: apli hori oso moloia da, zazpi apli deskargatu ditut, zure apliek xarma handia dute…

Ah! eta beste hizkuntza batzuetan (gaztelera barne!), forma hori ere jasotzen dute, nahiz eta ez duen bide handirik egin!

Zer diozue? Horrelakoak egin izan ditugu aurretik e? Akordatzen duela urte batzuk, @ri arroba esaten genionean?!?  Bide batez, begiratu bere garaian ikurtxoari euskaraz deitzeko jasotako proposamenen zerrenda. Tripak botatzen egon naiz tartetxo batez!

Bo, orduan zer diozue? Apli bai ala ez? 🙂

Erantzunik ez

Utzi zure erantzuna

Gune honek Akismet erabiltzen du zaborra murrizteko. Ikusi nola prozesatzen diren zure erantzunen datuak.

%d bloggers like this: