Zuotako zenbatek gordetzen duzue oraindik 80-90eko kasete bilduma etxean? Denboran bidaiatzea bezala da lantzean behin walkman zaharrari hautsa kendu eta halako bat entzutea. Gurasoek txiki-txikitan oparitutako Heidiren kapitulu bateko zinta hura, Yoplait yogurrekin irabazitako Felix Rodriguez de la Fuenteren audiodokumentala, institutuko irratirako grabatutako hit bildumak, euskaltegian ezagututako lagunek kopiatutako diskoak, unibertsitate garaian egindako irratsaioen grabazioak, Mike Oldfielden diskografia zintografia osoa (edo kasik)… Baina , ai! Denborak ez du barkatzen, eta zintetako askok ez dute asko gehiago iraungo…

Nire kasete bilduma, hautsez betea

Zorionez, gaur egun badira moduak norberaren ondare audioelektromagnetikoa erraz eta arin digitalizatzeko moduak. Pare bat erakutsiko dizkizuet jarraian, baten bati zeozertarako baliko zaizkiolakoan 😉

Griffin iMic

imicNik neuk iMic izeneko gailua erabiltzen dut zinta zaharretako soinuak MP3ra pasatzeko. USB gailu bat da, ordenagailuari lineako audio irteera eta sarrera ematen dizkiona. Mac OS X eta Windows XPrako balio du (Vistarako ez, ojo!), eta 40 euro inguru balio du. Gailuarekin batera, bi kable berezi datoz: batek 3,5 mmko kabila bana du alde bakoitzean. Haietako bat zure walkman zaharreko kaskoetarako irteeran sartu, bestea iMic-eko ‘IN’ zulotxoan, eta, paketean dakarren Final Vinyl softwarea edo nahiago duzun besteren bat erabiliz, di-da batean pasatzen da kasetearen edukia disko gogorrera.

plusdeckexPlusDeck EX,  sibaritentzat

Behar sofistikatuagoak izanez gero, Koreako PlusDeck etxeak edozeinen libidoa pizteko moduko gutizia sortu du: PlusDeck EX izenekoa garai bateko musika ekipo txikien modukoa da: kasette irakurgailu-grabailua du, irrati hartzailea, lineako sarrera, eskuko telefonoetarako audio sarrera (!?!), eta USB ataka. Onena da, kaseteak ez ezik, audio sarrera horietako edozeinetik sartzen den audioa ere ordenagailura pasatzeko gauza dela (irratia barne). Hori bai: prezioa misterio hutsa da.

Bide batez, etxe berberak badu bigarren bertsio bat, PusDeck2c izenekoa, edozein ordenagailutako CDrako hutsune batean koka daitekeena, beste unitate bat balitz moduan. Erabilera profesionalerako-edo oso egokia izan liteke (kaseteek inoiz erabilera profesionalik izan badute, behintzat).

tape2pc_angle_lgTape2PC, erabiltzaile esperientzia osoa berreskuratzeko

Baina kaseteak erabiltzearen esperientzia osoa berreskuratzeko, onena seguruena ION Audio etxearen Tape2PC izango da. Pletina bikoitzeko kasete irakurgailu/grabagailu honek 80ko estiloa errespetatzen du ehuneko ehunean, bira kontagailua eta guzti, eta kaseteen edukia ordenagailura pasatzeaz gain, kasetetik kaseterako kopiak egiteko aukera ere ematen du, 150 euro inguruan. Nostalgikoentzako soilik, e?

4 erantzun

  1. Benito 2009(e)ko otsailak 9
  2. joxe 2009(e)ko otsailak 10
  3. Marti(n) 2009(e)ko otsailak 10
  4. joxe 2009(e)ko otsailak 10

Utzi zure erantzuna

Gune honek Akismet erabiltzen du zaborra murrizteko. Ikusi nola prozesatzen diren zure erantzunen datuak.